Wargeyska Al Watan Oo Shaaciyay Waqtiga Uu Neymar Jr Caafimaadka U Marayo PSG & Goobta Uu Ku Mari Doono.

Barcelona waa iney si dhaqso leh u fakartaa isla markaana ay durba eegataa badalka Neymar Jr madama uu xidigaan qarka u saaran yahay inuu dhameystiro ku biiritaanka Paris Saint Germain, waxaana lasoo warinayaainuu 24-ka saac ee soo aadan caafimaadka u mari doono.

Neymar Jr dib uguma laaban Spain sida ay sameeyeen saaxiibadiis madama ay soo dhameesteen kulamadii fasaxa wuxuuna maanta oo isniin ah gaaray China si uu u guto hawlo shaqo oo dhanka shirkadda xayeysiinta ah.

Wargeyska laga leeyahay dalka Qatar ee Al Watan ayaa shaaca ka qaaday in xidigii hore Santos uu usoo duuli doono Doha si uu caafimaadka ugu maro Paris Saint Germain.

Mundo Deportivo oo ah warbaahin ka hawlgasha gobolka Catalan ayaa goor hore ku warbixisay in xidigaan heerka caalami ee qaranka Brazil uu goor hore go’aansaday inuu Qatar kula kulmo madaxweynaha PSG Nasser Al Khelaifi, waxeyna labadaan shaqsi ku kulmi doonaan xarunta Tv-ga BeIN Sports.

Arintaan waxey imaaneysaa xilli isbuuc ka hor ay shabakadda Marcaay shaaca ka qaaday in la kala jabin doono weeraryahanada MSN, waxaana haatan soo dhawaanaya heshiiska uu xidigaan ku tagi doono Parc des Princess.