Liverpool Oo Allianz Arena Ku Dubatay Bayern Munich, Klopp Oo Kooxdii Uu La Xifiltami Jirray Ee Bavaria Guuldaro Baday Iyo Reds Oo Finalka Audio Cupka La Ciyaari Doonta Atletico Madrid.

Kooxda Liverpool ayaa u soo baxday finalka Audi Cupka kadib markii ay 3:0 ku dubatay kooxda Bayern Munich oo marti loogu ahaa garoonkeeda Allianz Arena. Klopp ayaa helay guul ugu farxad badan kulan rasmi ah maadaama oo ay kooxdiisa Reds guuldaro wayn baday kooxda uu xifitanka wayni waqtiga dheer kala  soo dhexeeyay ee Bayern Munich.

Bayern Munich ayaa Allianz Arena ku soo dhawaysay kooxda Jurgen Klopp ee Liverpool kulan ka tirsanaa Audi Cupka waxayna kooxaha Bavaria iyo Reds doonayeen sidii ay ugu soo bixi lahaayeen finalka koobka Audi Cupka waxayna ciyaartani ahayd mid si wayn loo sugayay iyada oo Klopp uu dib ugu laabtay dalkiisa Germany isla markaana uu ka hor imanayay kooxda uu sanadaha badan la soo xifiltamayay ee Bayern Munich oo uu Carlo Ancelotti hogaaminayo.

Liverpool ayaa Bayern Munich si xaragoleh  ugu garaacday garoonkeeda oo si layaableh ay jamaahiirta Bayern Munich u soo buux dhaafiyeen waxayna Reds halkeeda ka sii wadatay guulihii ay ku soo jirtay kulamada xili ciyaareedka ka horeeya.

Daqiiqadii 7 aad ee kulankan ayay Liverpool heshay goolkeeda furitaanka kaas oo farxad khaas ah u ahaa jamaahiirta kooxda Klopp ee Reds waxaana goolkan dhaliyay xidiga dhaawac waqtiga dheer ahaa ka soo laabtay ee Sadio Mane kaas oo kulankii labaad oo xidhiidh ah ku soo bilawday shaxda Liverpool waxaana weerar deg deg ah oo ay Reds ku kala dhantaashay bayern soo bilaabay Roberto Firmino waxayna ciyaartu noqotay 1:0 ay Liverpool hogaanka ciyaarta kula wareegtay.

Daqiiqadii 20 aad Bayern Munich ayay qasab ku noqotay in ay xili horeba shaxdeeda isbadal ku samayso kadib markii uu dhaawac soo gaadhay Thiago Alcantara waxaana kaydka looga yeehday Renato Sanches oo ka mid ah xidigaha uu Klopp doonayo kaas oo qaab ciyaareed fiican ku muujiyay kulankan intii uu ku jiray.

Daqiiqadii 34 aad waxaa dhacay waxa ay jamaahiirta Liverpool ka sugayaan xili ciyaareedkan cusub waana qaabka ay Sadio Mane iyo Mohamed Salah safka weerarka uga wada ciyaari doonaan, Sadio Mane ayaa kubbad cajiib ah u bixiyay Alberto Moreno oo isna kulankan isku muujiyay wuxuuna xidiga ree Spain kubbada u soo karoosay Mohamed Salah kaas oo dhaliyay goolka labaad ee Liverpool waxayna ciyaartu noqotay 2:0 ay Reds hogaanka ciyaarta ku hayso.

Bayern Munich ayaan shaqo yar qaban laakiin dardarta Liverpool, weerarka deg dega ah iyo difaaca Reds oo shaqo fiican qabtay ayaa kooxda Ancelotti xaalada ku adkaysay waxaana qaybtii hore ee ciyaarta lagu kala nastay 2:0 ay Reds hogaanka ciyaarta ku haysay.

Qaybtii danbe ee ciyaarta labada tababare ayaa isbadalo badan sameeyay laakiin Bayern Munich ayaa qaybtii danbe ee ciyaarta u muuqatay mid si buuxda ciyaarta gacanta ugu qabtay balse Liverpool ayaa la soo baxday qaab ciyaareed isku jira difaacasho iyo weeraro deg deg ah oo aad u halis badan.

Marko Grujic oo ciyaarta badal ku soo galay ayaa darbo fiican birta Bayern Munich ku garaacay waxayna kubbadu ku dhacday goolhayaha waxanaa loo qaatay goolka saddexaad ee Liverpool laakiin Adam Lallana oo offside ku jiray ayaa qalad ku lahaa in uu lu lug yeeshay waxaana goolkan loo diiday offside ahaan laakiin da’yarka Kent ayaa difaaca Bayern ceebeeyay intii aanu Marko Grujic u dhigin kubbada uu goolkan la diiday ku dhaliyay.

Bayern Munich ayaa garan wayday qaabkii ay gool uga dhalin lahayd Liverpool inkasta oo uu xataaa Klopp saaray difaaciisa ugu muhiimsan ee Matip waxayna labada kooxoodba abuureen fursado goolal lagu dhalin karayay inta oo ay Bayern ahayd kooxda fursadaha ugu badan basle aan halista badan lahayn abuuraysay.

Daqiiqadii 83 aad waqtigii ciyaarta ugu cajiib sanayd ayay noqotay kadib markii uu Daniel Sturridge oo ciyaarta badal ku soo galay si layaableh uu uga dhex baxay difaaca Bayern Munich isla markaana uu kubbad kula soo baxay goolka waxaana baacsanayay saddex ciyaartoy laakiin kubbad cajiib ah oo uu ka dulqaaday goolhayaha ayaa goolka si fiican u gashay laakiin walwalka ugu wayn ayaa kadib bilawday markii uu Sturridge bawdada isqabtay ee uu muujiyay in jaqafta uu qaaday uu dhaawac ku soo gaadhay.

Waxay ciyaartu noqotay 3:0 ay Liverpool ku qaaqayso Bayern Munich waxaana bilawday in ciyaartoyda labada kooxood qaarkood ay isku dhacaan iyada oo Arturo Vidal oo ciyaarta soo galay uu xamaasada sii xoojiyay waxayna ugu danbayn ciyaartu ku dhamaatay 3:0 ay Liverpool guuldaro ku baday Bayern Munich.

Bayern Munich ayaa hadda kaalinta saddexaad u tartami doonta waxayna la ciyaari doontaa Napoli oo iyaduna guuldaro kala kulantay Atletico Madrid halka kooxda Klopp ee Reds ay isla barri finalka Audio Cupka ku wajihi doonto Atletico Madrid.